Íþróttir | Enski boltinn | mbl | 12.1.2025 | 17:59

Tíu United-menn áfram eftir vítakeppni

Rasmus Höjlund hjá Manchester United og Arsenal-maðurinn William Saliba eigast við í dag. AFP/Glyn Kirk

Manchester United er komið áfram í 4. umferð ensku bikarkeppninnar í fótbolta eftir útisigur á Arsenal í mögnuðum leik í dag. Réðust úrslitin í vítakeppni eftir 1:1-jafntefli, þrátt fyrir að United hafi verið manni færri frá 61. mínútu.

Fyrri hálfleikurinn var rólegur og gekk báðum liðum illa að skapa sér færi. Voru hálfleikstölur því 0:0.

Leikurinn lifnaði heldur betur við í seinni hálfleik og Bruno Fernandes kom United yfir á 52. mínútu með glæsilegri afgreiðslu úr teignum eftir sprett og sendingu frá Alejandro Garnacho.

Níu mínútum síðar fékk Diogo Dalot sitt annað gula spjald og þar með rautt þegar hann fór í harða tæklingu við hliðarlínuna. Tveimur mínútum síðar jafnaði Gabriel Magalhaes er hann skaut í Matthijs de Ligt og í netið úr teignum.

Arsenal skapaði sér nokkur afbragðsgóð færi í kjölfarið en Altay Bayindir varði hvað eftir annað mjög vel. Besta varslan kom á 72. mínútu er hann varði víti frá Martin Ödegaard.

Skömmu síðar varði hann glæsilega frá Declan Rice og Kai Havertz setti boltann yfir af stuttu færi í dauðafæri skömmu eftir það. Inn vildi boltinn ekki og því var framlengt.

Þrátt fyrir að bæði lið hafi fengið sín færi í framlengingunni var ekkert skorað í henni og réðust úrslitin því í vítakeppni. Þar skoraði United úr öllum fimm spyrnum sínum á meðan Bayindir varði frá Havertz.