Íþróttir | Rafíþróttir | mbl | 6.1.2025 | 12:42 | Uppfært 13:12

Kom, sá og sigraði alla

Þorsteinn Friðfinnsson er almennt talinn besti Counter Strike-leikmaður landsins og renndi stoðum undir það með því að vinna alla mögulega sigra á árinu.

„Það var bara gaman að vinna öll mót sem maður keppti í á árinu,“ segir Þorsteinn Friðfinnsson sem var óstöðvandi með Dusty í Counter Strike á nýliðnu ári og sigraði allt sem hægt var að sigra.

„Þetta var bara geggjað og nóg af skemmtilegum mótum,“ segir Þorsteinn, eða THOR eins og hann kallar sig á vígvelli Counter Strike, um rafíþróttaárið 2024 þegar hann slær hér botninn í áramótauppgjör deildanna sjö sem keppt var í á vegum Rafíþróttasambandsins í fyrra.

Frétt af mbl.is

Hefur mölvað Þórsara áður

Hann nefnir sérstaklega Stórmeistaramótið á fyrri hluta síðasta árs, HRinginn, Fragg-mótin og Ljósleiðaradeildina þar sem hann stóð uppi sem sigurvegari með Dusty í lok nóvember.

„Það var skemmtilegt að deildinni var breytt þannig núna að hún var spiluð á LAN-i. Það er mjög skemmtilegt hversu mikið er að gera í rafíþróttum á Íslandi. Allaveganna í Counter Strike.“

Frétt af mbl.is

Dusty nýr Íslandsmeistari í CS

Þegar Þorsteinn er spurður um persónulega hápunkta á nýliðnu ári nefnir hann óslitna sigurgöngu sína í fyrra. „Fyrir mig var bara geggjað að við unnum náttúrlega Stórmeistaramótið og svo líka HRingin og deildina,“ segir Þorsteinn og bendir á að þessa sigra hafi hann alla unnið með mismunandi samsettum liðum.