Stefán Teitur Þórðarson og liðsfélagar hans í Silkeborg lögðu stein í götu Sverris Inga Ingasonar og félaga í Midtjylland með því að vinna öruggan sigur, 3:0, í efri hluta dönsku úrvalsdeildarinnar í knattspyrnu í kvöld.
Silkeborg er í sjötta og neðsta sæti efri hlutans og hefur ekki að neinu að spila á meðan Midtjylland er í þriðja sæti með 52 stig, fjórum stigum á eftir toppliði Bröndby, og varð því af mikilvægum stigum.
Staðan var 3:0 í hálfleik þar sem Skagamaðurinn Stefán Teitur skoraði þriðja mark heimamanna skömmu fyrir leikhlé.
Hann lék allan leikinn á miðju Silkeborg og er búinn að skora sjö mörk í 23 deildarleikjum á tímabilinu.
Sverrir Ingi lék allan tímann í vörn Midtjylland.