Gustavo Alfaro, þjálfari Kosta Ríka, vakti athygli fyrir óvenjulega samlíkingu eftir að liðið gerði markalaust jafntefli við Brasilíu í D-riðli Ameríkubikarsins, Copa América, á þriðjudagskvöld.
Fyrir fram var búist við þægilegum sigri Brasilíu en Alfaro sagði á fréttamannafundi eftir leik að sínir menn hafi ávallt haft trú á því að geta náð í úrslit.
„Mér fannst varnarmennirnir og miðjan gera vel í að sjá til þess að Brasilía fengi jafn fá færi og raunin varð. Við vorum eins og Bruce Willis í The Sixth Sense.
Við vorum þeir einu sem vissum það fyrir kvikmyndina að við værum ekki dauðir. Fyrir myndina töldu allir fyrir fram að við værum dauðir,“ sagði hann í léttum dúr.
Vísaði Alfaro þar til þekktrar kvikmyndar frá árinu 1999 með Bruce Willis í aðalhlutverki, þar sem aðalkarakterinn sem Willis leikur uppgötvar seint í myndinni að hann hafi verið látinn allan tímann.