Tvö sjálfsmörk í toppslagnum

Düsseldorf gerði 1:1 jafntefli við Paderborn í toppslagnum í þýsku B-deild­inni í kvöld. Valgeir Lunddal Friðriksson og Ísak Bergmann Jóhannesson voru báðir í byrjunarliði Düsseldorf.

Liðin eru bæði með 21 stig í öðru og þriðja sæti, með sömu markatölu og aðeins einu stigi á eftir Hannover 96 sem er í toppsætinu.

Staðan var markalaus í hálfleik en Valgeir varð fyrir því óláni að skora sjálfsmark á 61. mínútu sem kom Paderborn yfir.

Calvin Brackelmann skoraði svo einnig sjálfsmark á fimmtu mínútu uppbótartímans sem jafnaði leikinn fyrir Düsseldorf.

• Blogga um frétt