„Mikilvægt vopn í okkar vopnabúri“

Harry Kane, enskur landsliðsmaður og framherji Bayern München, hefur skorað úr 26 vítum í röð.

Kane skoraði sigurmark Bayern í gær úr vítaspyrnu gegn Borussia Mönchengladbach en síðasta vítaklúðrið hans kom gegn Frakklandi á HM árið 2022.

Þýski markvörðurinn og fyrirliði Bayern, Manuel Neuer, fór fögrum orðum um Kane eftir leik.

„Við þurfum Harry, við vitum það. Hann er ekki aðeins frábær framherji á vítapunktinum heldur líka í teignum,“ sagði Neuer.

Kane hefur skorað 21 mark í jafnmörgum leikjum fyrir Bayern á þessari leiktíð.

„Hann býr til svæði fyrir aðra leikmenn og færin sem við sköpum eru oftar en ekki honum að þakka,“ sagði Neuer. „Hann er mikilvægt vopn í okkar vopnabúri,“ sagði Þjóðverjinn að lokum.

• Blogga um frétt