Vigdís samdi í Belgíu

Belgíska knattspyrnufélagið Anderlecht hefur fest kaup á sóknarmanninum Vigdísi Lilju Kristjánsdóttur frá uppeldisfélaginu Breiðabliki. Skrifaði hún undir tveggja og hálfs árs samning, til sumarsins 2027.

Anderlecht hefur orðið belgískur meistari undanfarin sjö tímabil en er sem stendur í öðru sæti A-deildarinnar, einu stigi á eftir Diljá Ýr Zomers og stöllum í Leuven.

Vigdís Lilja, sem er 19 ára gömul, var einn af lykilmönnum Breiðabliks á síðasta tímabili þegar liðið varð Íslandsmeistari.

Hún skoraði þá 11 mörk í 23 leikjum í Bestu deildinni en Vigdís Lilja getur leyst allar stöður framarlega á vellinum.

Alls á Vigdís Lilja að baki 62 leiki í efstu deild þar sem hún hefur skorað 16 mörk. Þar af eru fjórir leikir og tvö mörk fyrir Keflavík þar sem Vigdís Lilja lék að láni hluta sumarsins 2022.

• Blogga um frétt