Birgir Leifur Hafþórsson hefur lokið við 9 holur á öðrum keppnisdegi TCL-meistaramótsins á Evrópumótaröðinni í Kína. Hann lék á 36 höggum eða pari vallar og samtals er hann á 4 höggum undir pari. Þessa stundina er Birgir í 60. sæti en hann var í 23. sæti eftir fyrsta keppnisdaginn.
Skor margra keppenda á mótinu er mjög lágt og má nefna að Chapchai Nirat frá Taílandi er efstur að loknum 36 holum en hann er samtals á 17 höggum undir pari. James Heath frá Englandi lék vel í nótt eða á 63 höggum, 9 höggum undir pari vallar.
Birgir skrifaði á bloggsíðu sína áður en hann hóf keppni um kl. 5 í nótt að íslenskum tíma og sagði hann m.a. að um 30 stiga hiti væri á keppnissvæðinu.