Sveinn Elías í forystu eftir fyrstu grein

Sveinn Elías Elíasson, Fjölni, er í fyrsta sæti eftir fyrstu keppnisgrein í tugþraut á Evrópumeistaramóti 19 ára og yngri sem hófst í Hengelo í Hollandi í morgun. Sveinn Elías kom fyrstur í mark í 100 m hlaupi á 10,73 sekúndum og bætti drengjamet sitt um 16/100 úr sekúndu en það setti hann í fyrra. Þá var Sveinn Elías aðeins 1/100 úr sekúndur frá 18 ára gömlu meti Jóns Arnars Magnússonar í unglingaflokki (19-20 ára). Þá er tími Sveins Elíasar í sá besti sem Íslendingur hefur náð í 100 m hlaupi í fimm ár.

Sveinn Elías, sem er á átjánda ári, er þar með fremur óvænt í fyrsta sæti tugþrautarkeppninnar eftir þessa frábæru byrjun, hlaut samtals 922 stig fyrir þennan árangur, en næstbesti tíminn í hlaupinu í morgun var 10,76 sek. Næsta grein er langstökk, þá kúluvarp, hástökk og síðasta grein tugþrautarinnar í dag er 400m hlaup. Keppninni verður síðan framhaldið á morgun með fimm greinum.