„Strákarnir eru vanir þessu“

„Okk­ur gekk sjúk­lega vel en erum spennt fyr­ir Íslands­mót­inu að bæta það sem fór úr­skeiðis í dag,“ sagði Eva Bjarkey Þor­steins­dótt­ir, leikmaður blandaðs liðs Stjörn­unn­ar í hóp­fim­leik­um, sem tryggði sér sæti á Norður­landa­mót­inu sem fer fram í Finn­landi á þessu ári.

„Við lent­um 35 af 36 stökk­un­um okk­ar og eig­um samt al­veg eitt­hvað inni. Sér­stak­lega í dans­in­um, við feng­um tvö mó­ment ógild þar,“ sagði Eva í viðtali við mbl.is eft­ir mótið. 

Stjarn­an er eina liðið í blönduðum flokki og var því ekki að keppa á móti nein­um um titil­inn í dag.

„Það er al­veg skrítið, þetta er í fyrsta skipti sem ég er ekki að keppa á móti nein­um en strák­arn­ir eru van­ir þessu.

Þetta er samt ótrú­lega gam­an, við erum líka að horfa á lið úti og erum að bera okk­ur sam­an við þau því við erum að fara á Norður­landa­mótið.

Mark­miðið í dag var að æfa okk­ur fyr­ir Norður­landa­mótið og sjá hvað í okk­ur býr. Við erum bara að reyna toppa okk­ur og aðeins að æfa okk­ur að keppa sam­an. Þetta er nýtt lið og við höf­um aldrei keppt sam­an svo við erum aðeins að fá til­finn­ing­una fyr­ir því núna.“

Stjarn­an send­ir þrjú lið á Norður­landa­mótið og Eva tel­ur blandaða liðið eiga mögu­leika á að kom­ast á pall. 

„Mark­miðið er alltaf að standa okk­ur eins vel og við get­um og miðað við síðasta Norður­landa­mót þá eig­um við al­veg góðan séns á palli og erum að stefna þangað.“

• Blogga um frétt