Íþróttir | mbl | 5.4.2025 | 19:01 | Uppfært 22:21

Íshokkíeinvígi SA og SR hófst með látum

Leikmenn SR að fagna marki í dag. mbl.is/Egill Bjarni

Úrslitakeppnin í íshokkí karla hófst loks í dag tveimur vikum á eftir áætlun. Gömlu erkifjendurnir í SA og SR áttust við í frábærum leik í Skautahöllinni á Akureyri. SA vann leikinn 7:4 og er þá með 1:0 forustu í einvíginu.

SA komst í 1:0 en SR svaraði fljótt með tveimur mörkum og skoti í þverslána. SA-ingar virtust slegnir út af laginu um stund enda voru gestirnir að spila þá upp úr skautunum á tímabili. Akureyringum tókst þó að skora tvisvar á skömmum tíma og staðan eftir fyrsta leikhlutann var 3:2 fyrir SA.

Annar leikhlutinn einkenndist af miklum barningi og leikmenn voru í hörkubaráttu um allt svellið. Heimamenn í SA voru alltaf líklegri til að skora en það var SR sem kom inn marki og jafnaði í 3:3. Skömmu síðar fékk SA gullið tækifæri á að koma sér í forustu. Þá missti SR tvo leikmenn í refsingu þannig að aðeins þrír útispilarar SR þurftu að verjast fimm Akureyringum. Stóðu gestirnir vörnina stórvel og héldu hreinu.

Það var svo á lokamínútum leikhlutans sem SA setti þrjú mörk á augabragði og allt í einu var staðan orðin 6:3 fyrir SA.

Heimamenn héldu forskoti sínu stærstan hluta lokaleikhlutans en SR minnkaði muninn þegar rúmar fimm mínútur lifðu leiks. SA skoraði svo lokamark leiksins á lokamínútunni.

Næst mætast liðin i Reykjavík á þriðjudag.

Mörk/stoðsendingar:

SA: Gunnar Aðalgeir Arason 2/1, Uni Blöndal 0/3, Baltasar Hjálmarsson 0/3, Unnar Hafberg Rúnarsson 2/0, Jóhann Már Leifsson 2/0, Atli Þór Sveinsson 1/1, Róbert Hafberg 0/2, Orri Blöndal 0/1.

SR: Níels Hafsteinsson 2/0, Kári Arnarsson 2/0, Þorgils Eggertsson 0/2, Eduard Kascak 0/1, Alex Sveinsson 0/1, Sölvi Atlason 0/1.

Refsimínútur:

SA: 6 mín.

SR: 12 mín.

7:4

Loka

Unnar Rúnarsson (2. mín.)

Atli Sveinsson (13. mín.)

Gunnar Arason (17. mín.)

Unnar Rúnarsson (38. mín.)

Jóhann Leifsson (39. mín.)

Gunnar Arason (40. mín.)

Jóhann Leifsson (60. mín.)

Mörk

Níels Hafsteinsson (6. mín.)

Níels Hafsteinsson (12. mín.)

Kári Arnarsson (24. mín.)

Kári Arnarsson (54. mín.)

mín.

60		Leik lokið SA vinnur góðan 7:4 sigur í mjög skemmtileguum leik.
60		MARK! Jóhann Leifsson (SA) Mark 7:4. Keimlíkt mark hjá Jóhanni og fyrra markið hans. Hann kemst einn í gegn og afgreiðir pökkinn með bakhöndinni framhjá Jóhanni.
54		MARK! Kári Arnarsson (SR) Mark 6:4. Hvað var SA-liðið að gera þarna? Kári er skilinn einn eftir á vallarhelmingi SA og hann fær pökkinn, kemst aleinn að marki SA og skorar örugglega.
52		Bergþór Ágústsson (SA) 2 mín. brottvísun
51		SA er að seilast djúpt á bekkinn núna. Björn Már Jakobsson er á svellinu!
50		SR er hársbreidd frá því að gefa mark. Unnar nær í pökkinn en skorar ekki.
46		Alex Sveinsson (SR) 2 mín. brottvísun
43		Axel kemst einn gegn Róberti. Róbert ver í stöngina. SR fylgir svo eftir með skoti en pökkurinn spýtist framhjá marki SA.
41		SA á skot sem stefnir í skeytin. Jóhann ver.
41		Þriðji leikhluti hafinn
40		Öðrum leikhluta lokið Þvílíkar lokamínútur hjá SA. Þrjú mörk á færibandi og hagur þeirra er vænn í 6:3 stöðu.
40		MARK! Gunnar Arason (SA) Mark 6:3. Á lokasekúndu leiktímans. Þetta var yfirvegun og Gunnar gaf sér allan þann tíma sem hann mátti til að hlaða í skot. Pökkurinn söng í skeytunum og sekúndu síðar gall í tímahorninu.
39		Þorgils Eggertsson (SR) 2 mín. brottvísun Hann heggur á eftir leikmanni SA, sem steinligguur.
39		MARK! Jóhann Leifsson (SA) Mark 5:3. Skyndisókn. Jóhann sleppur í gegn og nær að senda pökkinn laust í bláhornið. Munurinn er tvö mörk í fyrsta skiptið í leiknum.
38		MARK! Unnar Rúnarsson (SA) Mark 4:3. Enn kemur glæsimark. Unnar fær pökkinn til sín eftir klafs og hann snýr baki í markið. Á augabragði snýr hann sér og sendir pökkinn í netið.
36		Það er jafnt í liðum á ný. SA fann engar glufur tveimur mönnum fleiri.
34		Rihards Verdins (SR) 2 mín. brottvísun SA er tveimur mönnum fleiri.
34		Jonathan Otuoma (SR) 2 mín. brottvísun
32		Þar kom að því að leikmenn færu að kýta aðeins. Það eru stympingar framan við mark SR.
31		SR fær dauðafæri en pökkurinn fer í boga yfir merkið.
29		Það er losarabragur á þessu núna. Liðin ná lítið að byggja upp. SA er að hóta öðru marki. Jóhann stendur vaktina vel í marki SR.
27		Það er jafnt í liðum á ný.
26		Aftur kemst Ólafur í færi en Jóhann ver vel.
25		Eduard Kascak (SR) 2 mín. brottvísun
24		MARK! Kári Arnarsson (SR) Mark 3:3. Þetta var mjög slysalegt mark. Kári sneiðir pökkinn laust í Róbert og þaðan fer hann yfir línuna.
22		SA kemst í mjög gott færi. Ólafur nær skoti en Jóhann ver með kylfuskaftinu.
21		Annar leikhluti hafinn
20		Fyrsta leikhluta lokið Stórkostlegum leikhluta er lokið og staðan er 3:2 fyrir SA.
20		SA endar þetta á skoti.
18		Þessum frábæra leikhluta fer að ljúka. Fáum við eitt mark í viðbót?
17		MARK! Gunnar Arason (SA) Mark 3:2. Baltasar hirðir pökkinn við mark SR og rennir honum út á Gunnar. Hann er 5 metra frá markinu og lætur vaða. Pökkurinn syngur í netinu.
15		Ja, hérna hér. Alex kemst einn upp að marki SA en Róbert ver naumlega frá honum. Þetta var líklega besta færi leiksins.
14		Andri Freyr er nærri búinn að skora fyrir SA eftir að hann stal pökknum bak við mark SR.
13		MARK! Atli Sveinsson (SA) Mark 2:2. Skot í stöng og inn. Þetta er geggjaður leikur.
12		Kári Arnarsson (SR) 2 mín. brottvísun Fyrtir að tefja.
12		MARK! Níels Hafsteinsson (SR) Mark 1:2. Þvílíkt spil. Þetta var stórkostlegt mark. Pökkurinn barst manna á milli þvert fyrir mark SA og heimamenn voru bara áhorfendur, enda gátu þeir lítið gert annað en að snúa sig nánast úr hálsliðnum þar sem pökkurinn barst fram hjá þeim fram og til baka.
10		Dagur Jónasson (SA) 2 mín. brottvísun Hann krækir.
10		SR sundurspilar heimamenn og Markús endar á að negla pökknum í markslána. Þarna sluppu heimamenn.
6		MARK! Níels Hafsteinsson (SR) Mark 1:1. Þetta er skondið mark. Þorgils átti skkot af löngu færi. Níels rétt kemur við pökkinn þegar hann flýgur fram hjá honum og síðan skrúfast hann í markið.
5		Jóhann Már á frábært upphlaup að marki SR. Hann endar aftan við það og gefur svo pökkinn út í teig. Félagar hans tveir missa af honum.
3		Gunnar Arason (SA) 2 mín. brottvísun Fyrir eitthvað sem fór fram hjá mér.
2		MARK! Unnar Rúnarsson (SA) Mark 1:0. Unnar skautar með pökkinn af varnarsvæði SA. Hann fær enga pressu á sig og kemst í fínt skotfæri. Þyggur hann það með þökkum og dúndrar pökknum í netið.
1		SR á fyrsta skotið. Kári lætur vaða en pökkurinn fer rétt framhjá skeytunum.
1		Leikur hafinn
0		Það er fjölmenni í Skautahöllinni í dag og mikil stemning.
0		Velkomin með mbl.is í Skautahöllina á Akureyri þar sem SA og SR mætast í fyrsta úrslitaleiknum um Íslandsmeistaratitil karla 2025. Vinna þarf þrjá leiki til að verða meistari en annar leikurinn fer fram í Reykjavík á þriðjudag og sá þriðji á Akureyri á fimmtudag.