Norska stjarnan Nora Mørk hefur mögulega spilað sinn síðasta leik fyrir handboltalandslið þjóðar sinnar.
Mørk, sem er 31 árs, hefur mikið glímt við meiðsli á ferlinum. Hún hefur unnið átta stórmót með norska liðinu og var í áraraðir ein allra besta handknattleikskona heims.
Hún hefur ekki getað beitt sér að fullu að undanförnu vegna meiðsla. Mikið álag með lands- og félagsliði hefur gert henni erfiðara fyrir.
Nettavisen í Noregi greinir frá að framtíð Mørk með landsliðinu sé í óvissu en hún átti sinn þátt í að Noregur varð ólympíumeistari í París í síðasta mánuði.