Gáfu röngum manni rautt spjald

Aganefnd Handknattleikssambands Íslands, HSÍ, hefur dregið til baka rautt spjald sem Ísak Logi Einarsson, leikmaður Stjörnunnar, fékk í leik gegn Val í úrvalsdeildinni þann 14. desember síðastliðinn.

Hlaut Ísak Logi útilokun vegna mjög grófs leikbrots í leiknum. Hængurinn var sá að hann var ekki sá brotlegi.

„Í agaskýrslu dómara sem liggur frammi fyrir aganefnd, kemur fram að við skoðun á framangreindu atviki á myndbandsupptöku fékk rangur leikmaður rautt spjald.

Samkvæmt agaskýrslu dómara var útilokun leik­mannsins því dregin til baka þar sem rangan leikmann hafi verið um að ræða.

Í samræmi við framangreint er það niðurstaða aganefndar að ekki skuli aðhafst frekar í málinu,“ sagði í úrskurði aganefndar á fundi þann 17. desember.

• Blogga um frétt