Gæslumaður fylgdi Elliða allan tímann

„Ég er ánægður með að strákarnir hafi klárað þetta fagmannlega,“ sagði Elliði Snær Viðarsson, fyrirliði íslenska landsliðsins í handbolta í fjarveru Arons Pálmarssonar, í samtali við mbl.is í dag frá liðshóteli íslenska liðsins í Zagreb.

Ísland vann Grænhöfðaeyjar með sannfærandi hætti, 34:21, í fyrsta leik sínum á HM í króatísku höfuðborginni í gærkvöldi. Elliði fékk sjálfur rautt spjald í fyrri hálfleik.

Frétt af mbl.is

Snorri ósáttur við fyrirliðann

„Minn leikur var vonbrigði. Mestu vonbrigðin voru þau að þetta var klárt rautt spjald. Það var lélegt hjá mér að bjóða upp á þetta. Það er aðallega það.

Ég fór á bekkinn og sagði að þetta hefði verið beint rautt. Ég gat ekki mótmælt. Ég ætlaði að taka á móti honum en fór með hendurnar beint í andlitið á honum. Þetta var klárt rautt,“ viðurkenndi Elliði.

Það er erfitt að vera einn uppi í stúku og geta ekki hjálpað liðinu.

„Það var tómlegt í gær. Það var sér gæslumaður sem fylgdi mér allan tímann og við vorum saman í þessu. Það er hundleiðinlegt að geta ekki hjálpað liðinu. Á meðan fer maður yfir þetta atriði í höfðinu og vonar að þeir sem eru inni á vellinum geri þetta vel,“ sagði Elliði.

• Blogga um frétt