Góð tilfinning frá fyrstu mínútu

„Ég er ótrúlega glaður að vinna,“ sagði Viggó Kristjánsson, markahæsti leikmaður Íslands í sigrinum glæsilega gegn Slóveníu, í samtali við mbl.is.

„Við erum búnir að bíða eftir þessum leik lengi. Spennan var búin að magnast fyrir leikinn og það fór gríðarlega mikil orka í hann hjá okkur öllum. Ég er rosalega ánægður,“ sagði Viggó.

Lokatölurnar, 23:18, segja allt sem segja þarf. Vörn og markvarsla íslenska liðsins var til fyrirmyndar.

„Við vorum í smá vandræðum til að byrja með þegar þeir voru þéttir í vörninni. Við vorum ekki að skora mikið en að sama skapi vorum við ótrúlega góðir í vörninni og þegar þeir fóru í gegn varði Viktor Gísli. Það var góð tilfinning frá fyrstu mínútu,“ sagði hann.

mbl.is/Eyþór

Íslenska liðinu gekk verr að skora undir lok leiksins, þrátt fyrir að fá fín færi. Viggó leið samt alltaf vel.

„Við vorum að komast í færin en við klikkuðum ekkert eðlilega mikið undir lokin. Að sama skapi var þetta aldrei í hættu. Þetta gefur okkur sjálfstraust. Það eru þrír leikir í milliriðli og við megum ekki fara fram úr okkur.

Ísland mætir Egyptalandi í fyrsta leik í milliriðli á miðvikudagskvöld. Sigur í þeim leik fer langt með að tryggja íslenska liðinu sæti í átta liða úrslitum.

„Við fögnum þessu í kvöld en að sama skapi byrjar maður strax í endurheimt og meðhöndlun. Við njótum sigursins en svo förum við að skoða næsta mótherja strax,“ sagði Viggó.

• Blogga um frétt