Íslenska kvennalandsliðið í körfuknattleik, 20 ára og yngri, tryggði sér í dag sæti í átta liða úrslitum B-deildar Evrópumótsins í Búlgaríu með því að sigra Búlgara, 71:61, í lokaumferð riðlakeppninnar.
Úkraína vann Austurríki, 70:51, og fékk sex stig, Ísland fékk fjögur stig, Búlgaría tvö og Austurríki ekkert.
Úkraína og Ísland fara í átta liða úrslitin en Búlgaría og Austurríki í keppni um sæti níu til sextán.
Leikurinn í dag var jafn lengi vel. Staðan í hálfleik var 38:33, Íslandi í hag en Búlgarar komust yfir í byrjun fjórða leikhluta með því að skora fimm fyrstu stig hans, 54:53. En eftir að staðan var jöfn, 59:59, skoraði íslenska liðið níu stig í röð og það gerði gæfumuninn.
Jana Falsdóttir og Agnes María Svansdóttir skoruðu 16 stig hvor, Eva Elíasdóttir 13 og Sara Boama 10 en Sara tók auk þess sjö fráköst.