Íþróttir | Körfubolti | mbl | 31.1.2025 | 9:05

Risasigur LeBrons og félaga

LeBron er áfram einn besti leikmaður deildarinnar, fertugur. AFP/Patrick Smith

Los Angeles Lakers átti ekki í neinum vandræðum með að sigra Washington Wizards í bandarísku höfuðborginni í NBA-deildinni í körfubolta í nótt. Urðu lokatölur 134:96.

Skoraði Lakers 78 stig í fyrri hálfleik en hægði aðeins á í seinni hálfleik, enda staðan orðin býsna þægileg.

LeBron James skoraði 24 stig fyrir Lakers, sem lék án Anthony Davis vegna meiðsla. Jordan Poole gerði 19 fyrir Washington.

Cleveland Cavaliers, topplið Austurdeildarinnar, sigraði Atlanta Hawks á heimavelli, 137:115. Darius Garland skoraði 26 stig fyrir Cleveland og Zaccharie Risacher 30 fyrir Atlanta.

Memphis Grizzlies hafði betur gegn Houston Rockets á heimavelli í baráttu um annað sæti Vesturdeildarinnar, 120:119. Desmond Bane skoraði 24 stig fyrir Memphis og Jalen Green gerði 25 fyrir Houston.

Öll úrslit NBA-deildarinnar í nótt:
Cleveland Cavaliers 137:115 Atlanta Hawks
Washington Wizards 96:134 Los Angeles Lakers
Utah Jazz 113:138 Minnesota Timberwolves
Memphis Grizzlies 120:119 Houston Rockets
Portland Trail Blazers 119:90 Orlando Magic