Innbyggðir eiginleikar gulls gera það að verkum að það hefur í árþúsundir haldið kaupmætti sínum og er sögulega séð talið vera ein besta vörnin gegn verðbólgu. Gull er einnig örugg höfn fyrir fjárfesta á viðsjárverðum tímum, til að mynda vegna stríðsátaka sem nú geisa í Úkraínu og Mið-Austurlöndum.
Þetta segir Halldór Björn Baldursson, framkvæmdastjóri og eigandi gullmarkaðurinn.is, í samtali við ViðskiptaMoggann. Tilefnið er stofnun á íslenskum gullmarkaði sem að sögn Halldórs verður sá fyrsti sinnar tegundar hér á landi. Hann segir að búið sé að opna vefsíðu markaðarins, sem gerir landsmönnum kleift að fjárfesta í gullmyntum og -stöngum frá helstu gullframleiðendum heims.
„Gull er raunveruleg verðmæti sem fólk getur fjárfest í á viðsjárverðum tímum og eiginleikar gulls gera það að verkum að það hækkar í verði. Af þeim sökum er gull góð trygging gegn niðursveiflum á fjármálamörkuðum,“ segir Halldór, spurður nánar um gullfjárfestingar.
Lesa má meira um málið í ViðskiptaMogganum í dag.
Uppfært 6. maí
Áður sagði í fréttinni að vefsíða gullmarkaðarins opni í september. Hið rétta er að búið er að opna vefsíðuna. Þetta hefur verið uppfært í fréttinni.