Utanríkisráðuneytið úthlutaði nýverið styrkjum til alls fjögurra íslenskra fyrirtækja úr Heimsmarkmiðasjóði atvinnulífsins. Fyrirtækin sem hlutu styrk eru Hananja, VAXA Technologies, Íslenski sjávarklasinn og Kerecis.
Styrkjunum er ætlað til samstarfsverkefna í þróunarríkjum og þar með að hvetja til þróunarsamvinnu.
Hananja hyggst nýta styrkinn til áframhaldandi undirbúnings við stofnun lyfjaverksmiðju í Malaví. VAXA Technologies vinnur að verkefni við að búa til grunnstaðal fyrir notkun á næringarbættum matvælum fyrir skólabörn á aldrinum 6-12 ára í Tansaníu með íslensku Ultra Spirulina mix (IUS-mix).
Íslenski sjávarklasinn miðar að því að efla sjálfbærni og virði sjávarafurða á Kyrrahafseyjum og Kerecis er í alþjóðlegu samstarfsverkefni sem snýr að því að bæta meðferð brunasára í Afganistan.