Stefnir í fyrstu vaxtalækkun í fjögur ár

Allt útlit er fyrir að seðlabanki Bandaríkjanna muni tilkynna um stýrivaxtalækkun í dag, en það yrði þá fyrsta lækkunin frá árinu 2020. 

Það er þó óljóst hversu mikil lækkunin muni verða, en ákvörðunin hefur áhrif á stöðu viðskiptabanka og annarra lánastofnana sem og rekstur fyrirtækja.

Seðlabanki Bandaríkjanna sendi frá sér yfirlýsingu um að annar dagur fundarhalda hjá peninastefnunefnd bankans hafi hafist kl. 9 að staðartíma í Washington í Bandaríkjunum (kl. 13 að íslenskum tíma). Ákvörðunin verði síðan tilkynnt síðar í dag og í kjölfarið haldinn blaðamannafundur með Jerome Powell, seðlabankastjóra Bandaríkjanna. 

Allt bendi til lækkunar

Hátt settir embættismenn innan seðlabankans hafa gefið til tilkynna að Powell hafi á undanförnum vikum talað í þá veru að komið sé að vaxtalækkun, þar sem dregið hafi úr verðbólgu sem nálgist nú verðbólgumarkmiðið, sem er tvö prósent. Þá mælist enn kólnun á vinnumarkaði. 

Sérfræðingar og álitsgjafar eru ekki sammála um hvað bankinn muni lækka vexti mikið, en það hefur ekki verið hærra í 23 ár, þar sem stýrivextirnir hafa verið á milli 5,25 til 5,5%.

• Blogga um frétt