Skuldastaða Alvotech heilbrigð

Heildarskuldir lyfjafyrirtækisins Alvotech nema um 1.028 milljónum bandaríkjadala.

Róbert Wessman, forstjóri og stjórnarformaður Alvotech, segir í samtali við ViðskiptaMoggann að skuldsetning félagsins sé heilbrigð og það muni taka félagið tiltölulega skamman tíma að greiða skuldir niður. Fyrirtækið skilaði jákvæðri EBITDA í fyrsta sinn í ár.

„Frá upphafi höfum við fjárfest fyrir um 1,9 milljarða dollara í félaginu þannig að ef við tökum mið af því og tölunum í uppgjörinu þá er um mjög heilbrigða skuldsetningu að ræða sem mun taka skamman tíma fyrir okkur að vinda ofan af með auknum tekjum og hagnaði,“ segir Róbert.

Heildartekjur Alvotech á fyrstu níu mánuðum ársins jukust um 300 milljónir dala frá sama tímabili árið 2023, í 339 milljónir dala, þar af voru tekjur 103 milljónir dala á þriðja ársfjórðungi.

Markaðssetning skilað árangri

Spurður hvað skýri tekjuvöxtinn segir Róbert það helst vera að markaðssetning inn á Bandaríkjamarkað hafi skilað árangri en félagið setti nýlega á markað hliðstæðu við gigtarlyfið Humira í Bandaríkjunum, en hliðstæðan var áður komin á markað í um 25 löndum í Evrópu, Kanada, Mið-Austurlöndum og Ástralíu. Þá hefur félagið markaðssett aðra hliðstæðu við Stelara, sem er lyf við gigt, psoriasis og meltingarsjúkdómum í Japan, Kanada og Evrópusambandinu.

Félagið sé að jafnt og þétt að koma sér fyrir á helstu lyfjamörkuðum í heiminum og það er nú þegar með leyfi til markaðssetningar í um 50 löndum. Þá fékk félagið í vor markaðsleyfi fyrir hliðstæðu við Stelara í Bandaríkjunum og hyggst félagið setja lyfið á markað þar í febrúar á næsta ári í samstarfi við Teva.

Þá hafa leyfistekjur verið að skila sér vel og afar vel hefur gengið í þróunarstarfi fyrirtæksins. Alvotech sendi í sumar og haust til umsagnar umsóknir um markaðsleyfi fyrir þrjú ný lyf til viðbótar við þau tvö sem nú þegar eru á markaði.

„Það eru helst þessi atriði sem skýra tekjuvöxtinn og þann árangur sem við erum að sjá í dag. Fram til ársins 2022 var félagið þróunarfélag en er nú farið að skila tekjum,“ segir Róbert.

Viðtalið má lesa í heild sinni í ViðskiptaMogganum í dag.