Skel hlýtur viðskiptaverðlaun

Viðskiptin marka nýtt upphaf í sögu þessarar þekktustu verslunarkeðju í Belgíu segir jafnframt í umsögn dómnefndar sem undirstriki alþjóðlegt eðli verslunarviðskipta. Enn fremur segir að framtíð verslunarkeðjunnar sé trygg í höndum reyndra fjárfesta á smásölumarkaði.

Viðurkenningin kom á óvart

Lárus Árnason, forstöðumaður viðskiptaþróunar hjá Skel, segir að viðurkenningin hafi komið þeim skemmtilega á óvart. Aðaláherslan eftir að viðskiptin gengu í gegn hafi verið að hlúa að rekstrinum og byrja að innleiða nýjungar eins og að útvíkka vöruframboðið í verslunum og straumlínulaga reksturinn.

Hann segir að við birtingu á ársuppgjöri Skeljar fyrir 2023 í febrúar hafi félagið tilkynnt að stefna þess væri að auka vægi erlendrar fjárfestingar í allt að 30% af eignum.

„Okkar hlutverk er að þróa tækifæri með langtímaverðmætasköpun að leiðarljósi og við sjáum mikil fjárfestingartækifæri í Evrópu fyrir Skel. Við höfum frá stofnun lagt mikla áherslu á að vinna með góðum samstarfsaðilum í þeim verkefnum sem við tökum þátt í. Það er alltaf gaman að vinna verðlaun og fyrst og fremst er það viðurkenning fyrir alla þá sem koma að verkefninu,“ segir Lárus.

Framtíðarsýnin réð úrslitum

Á bak við Skel og Axcent eru frumkvöðlarnir Ayad Al-Saffar og Jón Ásgeir Jóhannesson sem báðir hafa mikla reynslu af rekstri og fjárfestingum á smásölu- og neytendamarkaði.

Lárus segir að það sem réð úrslitum í söluferlinu hafi verið framtíðarsýn Skel og Axcent.

„Miklar sviptingar hafa verið í rekstrarumhverfi verslananna í Evrópu undanfarin ár. Skel ásamt samstarfsaðila okkar Axcent of Scandinavia var boðið að taka þátt söluferli á INNO ásamt fleiri fagfjárfestum. Seljandi var þýska ríkið, sem eignaðist félagið eftir gjaldþrot móðurfélagsins Galeria Karstadt Kaufhof,“ segir Lárus.

Greinin birtist í Morgunblaðinu í dag.