26 urðu fyrir tjóni

Hjálmar Sigurþórsson, framkvæmdastjóri fyrirtækjasviðs og staðgengill forstjóra hjá TM segir í samtali við ViðskiptaMoggann spurður um rekstur TM á árinu 2024 að hann hafi gengið mjög vel. „Að vísu varð mikill bruni í Kringlunni sem var mjög stór atburður á íslenskan mælikvarða. Ef við horfum 25 ár aftur í tímann er þetta með stærstu brunaatburðum á tímabilinu. Heildartjón er um 2,5 milljarðar. Það er mjög mikið ef maður setur það í samhengi við hvað íslensku félögin eru að greiða í iðgjöld til endurtryggjenda á ári. Tjónið er miklu meira en það.“

Hjálmar segir að TM greiði drjúgan hluta tjónsins. „Við tryggjum 38 verslanir í Kringlunni, undir 24 félögum (sum með fleiri en eina verslun). 26 af þessum verslunum urðu fyrir tjóni.“

Aðspurður segir Hjálmar að öllum viðgerðum sé nú nánast lokið eftir sex mánaða vinnu. Starfsmenn TM hafi þar unnið þrekvirki.

Man eftir einni

Hjálmar segist nær aldrei hafa hitt manneskju sem átt hafi sér draum um að vinna í tryggingum. „Ég man í fljótu bragði eftir einni manneskju. Afburðanemanda úr HR. Guðmundur Sigurðsson deildarforseti hringdi í mig og sagði frá áhuga hennar. Mér fannst það fyndið, enda hafði ég aldrei heyrt þetta áður. Hún kom svo til starfa hjá TM og vinnur hér enn,“ segir Hjálmar og brosir.

Tilviljun réð því að Hjálmar sjálfur réðst til TM. „Ég ætlaði að vinna í eitt ár eftir menntaskóla og sótti um í TM og í Japis í Kringlunni, enda mikill tónlistaráhugamaður. Ég fékk bæði störfin en var lofað betri launum í Japis. Ég spurði framkvæmdastjóra Skipavíkur í heimabæ mínum Stykkishólmi, Ólaf, hvað ég ætti að gera og hann sagði að þetta væri engin spurning: „Þú ferð í Tryggingamiðstöðina. Þar eru góðir KR-ingar,“ sagði hann. Ég fór að hans ráðum og hef verið hér síðan.“

Síðar fór Hjálmar í nám í tryggingafræðum til Sviss. „Þá var ég á leið að hætta og búinn að sækja um nám í íþróttaháskóla í Köln í Þýskalandi. Gunnar forstjóri settist hjá mér og bauð mér í staðinn að fara til Sviss. Ég þáði það og ekki löngu seinna, eða árið 1994, var ég gerður að stjórnanda. Löngu síðar, árið 2006, fór ég svo í MBA-nám.“

Gítarleikari í Jójó

Spurður að lokum nánar um tónlistastaráhugann segir Hjálmar að hann grípi oft í gítarinn og hafi spilað á rafmagnsgítar í hinni fornfrægu gleðipopp- og sveitaballasveit Jójó frá Skagaströnd, sigurvegara Músíktilrauna árið 1988. „Það var meiriháttar gaman að upplifa það að ferðast um landið og spila á böllum. Við hættum svo árið 1990. Þá var maður kominn með nóg af þessu harki, en maður kynntist mörgum skemmtilegum fýrum á þessu tímabili. Ég hefði alls ekki viljað missa af því,“ segir Hjálmar að lokum.