Boltinn hjá stjórnvöldum

Viðskiptaráð Íslands lagði nýverið fram 60 hagræðingartillögur sem samanlagt skila 122 milljarða króna árlegri hagræðingu í rekstri ríkissjóðs. Í viðskiptahluta Dagmála er rætt við Gunnar Úlfarsson hagfræðing Viðskiptaráðs.

Aðspurður hvort hann telji líklegt að tillögurnar verði að veruleika segist Gunnar vera bjartsýnn. Vinna ríkisstjórnarinnar sé enn á fyrstu metrunum en mikilvægt skref hafi verið tekið með því að varpa ljósi á þau hagræðingartækifæri sem eru til staðar. Hann fagnar framtakinu og bindur vonir við að starfshópurinn sem fer yfir tillögurnar gefi hugmyndum ráðsins góðan gaum.

Boltinn sé hjá stjórnvöldum

„Boltinn er núna hjá stjórnvöldum. Við höfum skilað inn okkar umsögn og vonum að sem flestar af tillögum okkar verði að veruleika. Nú skiptir lykilmáli að raunverulegar hagræðingaraðgerðir fylgi í kjölfar samráðsins,“ segir hann.

Gunnar Úlfarsson hagfræðingur Viðskiptaráðs er gestur Magdalenu í Dagmálum. mbl.is/Hallur Már