Nýtt myndband við Vor í Vaglaskógi

Monitor frumsýnir í dag glænýtt myndband hljómsveitarinnar Kaleo við lagið Vor í Vaglaskógi. Lagið trónir á toppi vinsældarlista Rásar 2 um þessar mundir. Hljómsveitin hefur vakið mikla athygli að undanförnu og útgáfa þeirra að þessu sígilda dægurlagi hefur slegið rækilega í gegn.

Strákarnir kláruðu að skjóta myndbandið á mánudaginn og fengu til liðs við sig þá Baldvin Vernharðsson og Hörð Frey Brynjarsson sem stjórnuðu upptökum. Þeir vilja koma á framfæri sérstöku þakklæti til þeirra sem komu að gerð myndbandsins þar sem allir gáfu vinnu sína.

Hljómsveitina Kaleo skipa Mosfellingarnir Jökull Júlíusson, Daníel Ægir Kristjánsson, Davíð Antonsson og Rubin Pollock. Strákarnir undirbúa nú sína fyrstu plötu sem væntanleg er seinna í sumar.

Kaleo verður á Gamla Gauknum í kvöld ásamt hljómsveitinni Vintage Caravan og hefjast tónleikarnir kl. 22:30.

• Blogga um frétt