Lesandi hrekur rannsókn um ófríð börn

Í dag hafa Monitor borist fjöl­mörg tölvu­skeyti vegna frétt­ar þess efn­is að eldri feður eign­ist ófríðari börn en þeir sem yngri eru. Skeyt­in koma velflest frá reiðum mæðrum sem eru gríðarlega ósátt­ar við þá hleypi­dóma sem þeim þykir hinir „meintu“ vís­inda­menn við Vín­ar­há­skóla halda á lofti með sín­um „meintu“ niður­stöðum.

Klók­ur les­andi ákvað að una ekki þess­um staðhæf­ing­um held­ur fram­kvæma sína eig­in rann­sókn. Með rann­sókn­inni mun les­and­inn hafa afsannað niður­stöður upp­runa­legu rann­sókn­ar­inn­ar með afar ein­föld­um hætti og bað hún um að niður­stöður henn­ar yrðu birt­ar.

„Faðir manns­ins míns var 16 ára þegar hann átti hann en maður­inn minn var 45 þegar hann átti son minn. Sam­kvæmt þess­ari er­lendu rann­sókn á maður­inn minn að vera alla­veg­ana 10% meira aðlaðandi en son­ur minn. Það er hins veg­ar ekki svo og hef ég þar með afsannað þessa rann­sókn. Bar ég þetta und­ir ágæt­is þýði og voru all­ir sam­mála um þetta,“ seg­ir í bréfi les­and­ans. 

Monitor þakk­ar fyr­ir þessa ágætu ábend­ingu og hvet­ur les­end­ur til frek­ari rann­sókn­ar­starfa og ábend­inga í framtíðinni.

• 1 blogg um frétt­ina

Bloggað um frétt­ina

• Wil­helm Em­ils­son: DNA