Of gömul til að vera fegurðardrottning

Hin háaldraða Amanda Longacre var nýlega krýnd Ungfrú Delaware en stuttu síðar var hún svipt krúnunni sökum hækkandi aldurs. Reglur Fegurðarsamkeppni Bandaríkjanna segja til um að þátttakendur megi aðeins vera á aldursbilinu 17 til 24 ára. Longacre verður 25 ára í október og er því augljóslega of nálægt grafarbakkanum til að bera krúnuna.

„Ég er í svo, þú veist, miklu uppnámi. Ég stend hérna eftir og velti því fyrir hvers vegna ég var sett í þessa aðstöðu til að byrja með. Það er eins og þau séu að reyna að stroka mig út, eins og þetta hafi aldrei gerst og það er ekki sanngjarnt því ég vann og á skilið að vera fulltrúi míns ríkis. Ég vil tækifærið til að vera í Ungfrú Bandaríkin ennþá,“ sagði Longacre í samtali við NBC.

Longacre er unglamb enn um sinn, næstu þrjá mánuði í það minnsta, og berst því með krafti æskunnar fyrir rétti sínum og hver veit nema það hafist.