Smartland Mörtu Maríu | Frami | mbl | 6.7.2014 | 16:00

Á hund í framtíðardraumum sínum

Bergþóra Benediktsdóttir vonast til að komast sem mest í sund, fjölskyldufaðmlög og happy hour með vinum inn á milli skemmtilegra vinnudaga í sumar. mbl.is/Þórður Arnar Þórðarson

Bergþóra Benediktsdóttir er 29 ára gömul og starfar sem mannauðsstjóri hjá Plain Vanilla. Hún hefur búið í nokkrum löndum yfir ævina en uppáhaldslandið hennar er Tansanía, en þar dvaldi hún fyrir tveimur árum síðan, og getur ekki beðið eftir að komast þangað aftur. Hún horfir lítið á sjónvarp, en hlustar aftur á móti á útvarp og podköst linnulaust.

Ertu búin að skipuleggja sumarið? Það sem var skipulagt er nú þegar komið og farið. Ég fór á femíníska risaráðstefnu í Malmö í byrjun júní og eyddi síðustu viku á Vestfjörðum í smá hleðslu. Hvorttveggja var endurnærandi og núna vona ég að ég komist bara sem mest í sund, fjölskyldufaðmlög og happy hour með vinum inn á milli skemmtilegra vinnudaga.

Hvert er uppáhaldslandið þitt/borgin þín? Ég eyddi frekar löngum tíma í Tansaníu fyrir tveimur árum og landið sigraði mig algjörlega. Ég get ekki beðið eftir að komast þangað aftur.

Værir þú til í að búa einhversstaðar annarsstaðar en á Íslandi? Já. Ég hef búið í nokkrum löndum fram að þessu, núna síðast í Suður-Frakklandi. Ég á það til að vera frekar eirðarlaus og það brýst oft fram í því að ég tek ákvörðun um að flytja á milli landa. Ég efast ekki um að ég eigi eftir að eyða þónokkrum árum í viðbót erlendis.

Ertu dugleg að elda? Já, ég elska að elda - sérstaklega fyrir annað fólk. En ég get líka verið fáránlega nægjusöm og borða til dæmis mjög gjarnan kartöflur eða cheerios í kvöldmat ef ég þarf bara að hugsa um sjálfa mig.

Prjónar þú? Nei, það geri ég svo sannarlega ekki.

Horfir þú mikið á sjónvarp? Alveg afspyrnulítið. En ég hlusta aftur á móti á útvarp og podköst linnulaust. Uppáhalds podkastið mitt heitir The Moth og ég er alltaf að reyna að troða því upp á fólk.

Áttu gæludýr? Nei. En ég á alltaf hund í framtíðardraumum mínum. Sorrí mamma.

Hver er draumurinn? Að Ísland skapi hvetjandi viðskiptaumhverfi fyrir fyrirtæki sem reiða sig á hugvit, Tom Waits haldi tónleika í Gamla bíói, útisundlaugin hjá Sundhöllinni verði tilbúin 2015 en ekki 2017 og að ég verði heilsuhraust, glöð og fáist áfram við krefjandi og skemmtileg verkefni.