Matur | mbl | 29.6.2015 | 14:09 | Uppfært 30.6.2015 9:32

Fjölbreytilegt eggja-„soufflé“ í morgunsárið

Girnileg egg. Ljósmynd/Ragnar Freyr

„Ég er kominn í eins og hálfs árs starfsleyfi frá gigtardeildinni í Lundi. Við munum flytja okkur aðeins um set og hafa vetursetu (og aðeins meira til) í Brighton á Englandi. Þar stefnir Snædís á framhaldsnám í sálfræði og ætlar að auka á þekkingu sína í hugrænni atferlismeðferð. Brighton þekki ég ágætlega þar sem ég bjó þar í eitt ár sem barn á meðan faðir minn, Ingvar, var í meistaranámi við sama háskóla og Snædís mun stunda sitt nám. Ég hef heimsótt borgina síðan þá og höfum við heimsótt kollega minn, Roger Duckitt, nokkrum sinnum á síðustu árum,“ segir Ragnar Freyr Ingvarsson, Læknirinn í eldhúsinu, í sínu nýjasta bloggi.

Fjölbreytilegt eggja-„soufflé“ í morgunsárið

Ég er afar hrifinn af eggjum. Egg eru næstum því hinn fullkomni matur - ótrúlega fjölbreytt og með eindæmum holl. Ég byrja næstum því hvern einasta morgun með því að snæða egg, stundum bara steikt upp úr smjöri - „sunny side up“, stundum „over easy“, en oftast sem eggjahræru og einstaka sinnum sem ommilettu. Veit varla betri leið til að byrja daginn!

Og fyrir þá sem hafa áhyggjur af kólesterólinu - gleymið því bara - egg eru holl, mettandi og full af vítamínum. Frábært veganesti úr í daginn.

Og - kaupið almennileg egg - ég fæ mín frá samstarfsmanni mínum á gigtardeildinni sem býr á bóndabæ og er með fjöldann allan af hænum og selur mér vikulega ljúffeng lífræn egg! Þau eru miklu betri á bragðið en egg frá búrhænum! Treystið mér!

Fyrir fjögur eggja-„soufflé“

4 stór egg

70 ml rjómi

salt og pipar

Fyllingar

3 sneiðar af steiktu beikoni

pepperoni/salamisneiðar

niðurskornir tómatar

paprikusneiðar

nóg af góðum osti

Ég keypti þessa dásamlegu tómata á grænmetismarkaðnum í gærmorgun. Ég elska að fara niður í bæ á laugardagsmorgnum og kaupa nýtt ferskt grænmeti. Í gær keypti ég líka fersk jarðarber sem voru á tilboði eftir Jónsmessuna, rótargrænmeti, vaxbaunir og heilmikið meira!

Jæja, aftur að morgunverðinum. Brjótið fjögur egg í skál og hrærið rjómanum saman við. Saltið og piprið og þeytið vandlega saman. Smyrjið síðan eldföstu mótin með smá smjöri og raðið fyllingunum ofan í.

Alvöru eggja-soufflé innheldur meira en bara egg og rjóma (mjólk) - smá hveiti er alltaf sett saman við en ég sleppti því bara. Til að gera alvörusoufflé eru hvíturnar einnig aðskildar og þeyttar vel og svo blandað saman við eggin til að gera souffléið mjög loftkennt. En hér fór ég styttri leið.