Það var glatt á hjalla í Borgarleikhúsinu þegar verkið, Úti að aka, var frumsýnt. Halldór Halldórsson oddviti Sjálfstæðisflokksins í Reykjavík lét sig ekki vanta en með honum í för var kærasta hans, Sigríður Hjálmarsdóttir. 

„Úti að aka er farsi eins og þeir gerast bestir. Jón Jónsson, leigubílstjóri, er ekki allur þar sem hann er séður; hann á tvær eiginkonur, þær Guðrúnu í Hafnarfirði og Helgu í Mosfellsbæ. Guðrún veit ekki af Helgu og Helga hefur ekki hugmynd um Guðrúnu og Jón brunar sæll og glaður milli bæjarfélaga til að sinna báðum heimilum. En Adam var ekki lengi í Paradís! Börnin hans, af sitt hvoru hjónabandinu, kynnast fyrir slysni á Facebook og plana stefnumót. Til að afstýra stórslysi kokkar Jón upp fjarstæðukenndan lygavef þar sem enginn veit lengur hvað snýr upp og hvað niður. Á endanum er ekki ljóst hver hefur leikið á hvern eða hver er í rauninni úti að aka,“ segir í umfjöllun um sýninguna. 

Höfundurinn Ray Cooney er farsælasta gamanleikjaskáld samtímans. Borgarleikhúsið hefur áður sýnt verk hans við gríðarlegar vinsældir og metaðsókn, Viltu finna milljón, Nei, ráðherra! og Beint í æð! Gísli Rúnar Jónsson íslenskaði og staðfærði öll verkin við afbragðs viðtökur.

Í Úti að aka er einvala hópur leikara undir stjórn Magnúsar Geirs Þórðarsonar. Með hlutverkin í sýningunni fara Ilmur Kristjánsdóttir, Hilmir Snær Guðnason, Elma Stefanía Ágústsdóttir, Hilmar Guðjónsson, Halldór Gylfason, Halldóra Geirharðsdóttir og Bergur Þór Ingólfsson.