Það var gleði og glaumur í Hörpu í gær þegar tvær sýningar voru opnaðar á HönnunarMars. Annars vegar sýning á vegum Félags húsgagna- og innréttingaframleiðenda og hins vegar Samtaka arkitektastofa (SAMARK). Sýningarnar eru settar upp í samstarfi við Samtök iðnaðarins.

Á sýningu Félags húsgagna- og innréttingaframleiðenda gefur að líta þversnið af því nýjasta í íslenskri hönnun og húsgagnaframleiðslu. Tólf sýnendur endurspegla breitt svið, allt frá stórum framleiðendum til sjálfstæðra hönnuða. Á sýningunni haldast í hendur falleg hönnun og gott handbragð þar sem hugvit og verkvit er samtvinnað í eitt.   

Virðisaukandi arkitektúr er yfirskrift sýningar SAMARK og verða í Himnastiganum í Hörpu til sýnis verkefni ellefu arkitektastofa. Á sýningunni verða valin verkefni sem endurspegla með ólíkum hætti hvernig hús, byggingar, borgarrými og landslag eiga þátt í að skapa betri ramma um daglegt líf okkar og þar með auka virði fyrir alla. Dæmi um virðisauka eru samgöngumannvirki sem stytta ferðatíma og auka öryggi, vel hönnuð vinnurými sem auka afköst og vellíðan starfsmanna og endurhönnuð sjúkrarými sem hafa dregið úr lyfjanotkun og bætt lífsgæði sjúklinga.