Það var vel mætt á Viðskiptaþing sem fór fram á Hilton Reykjavík Nordica á fimmtudaginn var. Um 500 manns mættu en yfirskrift þingsins í ár var: Hið opinbera: Get ég aðstoðað?

Ásgeir Jónsson Seðlabankastjóri var á Viðskiptaþinginu en þar var þessi framúrskarandi mynd tekin af honum og Lilju Björk Einarsdóttur bankastjóra Landsbankans. 

Þingið hófst á ávarpi frá fráfarandi formanni Viðskiptaráðs, Ara Fenger. Í ávarpinu fjallaði hann um mikilvægi þess að innleiða þjónustumiðað viðhorf hjá hinu opinbera og lagði áherslu á aðhald í rekstri. Ari benti jafnframt á að lausnin væri ekki flöt aðhaldskrafa á stofnanir og ráðuneyti, heldur ný hugsun og forgangsröðun. Þar mundi breyting á lögum um réttindi og skyldur starfsmanna ríkisins spila stórt hlutverk.

Ari fór svo yfir sín viðburðaríku fjögur ár sem formaður Viðskiptaráðs, en heimsfaraldur, stríð og jarðhræringar hafa einkennt þann tíma, og hvatti íslenskt atvinnulíf áfram til aukinnar verðmætasköpunar. Hann lauk svo ávarpi sínu á því að þakka fyrir ánægjulegt samstarf og bauð nýjan formann Viðskiptaráðs, Andra Þór Guðmundsson, forstjóra Ölgerðarinnar, velkominn til starfa. Andri hélt stutt ávarp, þar sem hann áréttaði mikilvægi þess að grípa þau tækifæri sem væru til staðar á Íslandi og að Viðskiptaráð héldi áfram að vera öflugt hreyfiafl til góðra verka.