Skipið sekkur í þrívídd

í ár eru eitt hundrað ár liðin frá því að glæsifleytan sem átti ekki að geta sokkið, Titanic, sökk undan ströndum Nýfundnalands. Kvikmyndagerðarmaðurinn James Cameron gerði víðfræga verðlaunamynd byggða á slysinu árið 1998, sællar minningar, og rakaði saman bíógestum og vegtyllum svo fordæmi voru vart fyrir. Í ljósi gríðarlegra vinsælda þrívíddarmyndar hans, Avatar, ákvað hann að taka Titanic í gegn og setja hana í þrívídd. Ljóst má telja að útkoman verður tilkomumikið sjónarspil enda þótti upprunalega útgáfan áhrifarík þó í flatri vídd væri. Skipið mikla verður eftir sem áður alveg jafn dauðadæmt en mun sjálfsagt sökkva með enn meiri tilþrifum í þetta sinnið.

Þrívíddarútgfáfan var heimsfrumsýnd í London í fyrradag og mætti Cameron með spúsu sína, leikkonuna Suzy Amis, upp á arminn. Virkaði leikstjórinn býsna brattur að sjá miðað við að fyrr í vikunni lét hann gamlan draum rætast og kafaði í sérhönnuðu hylki niður á dýpsta punkt heimshafanna sem er í Kyrrahafinu og er á 11 kílómetra dýpi. Amis leit heldur lakar út og hefur getum verið leitt að því að einhver veikindi plagi hana.

Kate Winslet var hins vegar hin glæsilegasta og ljómaði á rauða dreglinum. Mótleikara hennar, Leonardo DiCaprio var hvergi að sjá að þessu sinni.