Jennifer Connelly með barnið í Bankastræti

Leikkonan Jennifer Connelly er stödd hérlendis ásamt eiginmanni sínum, Paul Bettany, og börnum þeirra. Smartland rakst á hjónin þegar þau röltu um Reykjavík og nutu veðurblíðunnar. Þau gengu meðal annars niður Laugaveg og Bankastræti. Í Bankastrætinu stoppuðu þau í 66 Norður og keyptu íslenskan hátískuútivistarfatnað.

Fjölskyldan kom til landsins á fimmtudaginn í síðustu viku og hefur lítið farið fyrir þeim hérlendis. Leikkonan er hérlendis í tökum á myndinni Noah, en þar leikur hún á móti Russell Crowe, Anthony Hopkins og Emmu Watson.

Á myndunum sést Jennifer Connelly með dóttur sína í fanginu en hún fæddist í maí 2011. Hún klæddist að Hollywood-stjörnusið, ljósum gallabuxum og með sólgleraugu. Aðstoðarmaður hjónanna var með í för í dag en hann klæddist svartri 66 Norður-úlpu eins og sést á myndunum.