Skónum rænt á meðan hún fór í sjósund

Þóra Hallgrímsdóttir, kennari við lagadeild HR og lögmaður, lenti í leiðinlegu atviki á nýársdag þegar hún ákvað að fara í sitt árlega sjósund ásamt vinkonu sinni. Á meðan hún fór í ískaldan sjóinn voru skór hennar og snyrtibudda tekin ófrjálsri hendi. „Við fórum frekar seint af stað og því voru ekki margir í sjósundi á þessum tíma. Ég skildi dótið mitt eftir í búningsklefanum og þegar við komum upp úr voru skórnir mínir og snyrtibuddan horfin,“ segir Þóra. 

Hún þurfti þó ekki að fara á sundbolnum heim því fötin hennar voru á sínum stað ásamt fötum vinkonu hennar. Þóra segir að sá sem hafi haft skótau hennar með sér á brott hafi greinilega góðan smekk því skórnir voru nýlegir frá Ganni og skörtuðu 9 cm fylltum hæl.

„Að ganga blaut og köld á fótum úr Nauthólsvík inn í nýtt ár þýðir eitthvað ofboðslegt. Just u wait!“