Smartland Mörtu Maríu | Frægð | mbl | 5.6.2013 | 12:15

Hann hafði ekki bara áhuga á sjálfum sér

Hemmi Gunn. mbl.is

„Sumir sem ég þekki í skemmtana og fjölmiðlabransanum hafa bara áhuga á sjálfum sér, spyrja aldrei hvernig maður hafi það eða hvað sé að frétta af fjölskyldunni. Þannig var Hemmi ekki. Hann hafði raunverulegan áhuga á lífi og líðan þeirra sem hann hitti. Hann var góður gæi, yndislegur maður Þess vegna var hann elskaður af þjóð sem kann stundum ekki að hlæja og gráta saman. Sólargeislans verður saknað. Góða ferð elsku vinur,“ sagði Felix Bergsson á Facebook-síðu sinni en samfélagsmiðillinn logaði eftir að fréttir bárust að því að hinn ástsæli skemmtikraftur, fjölmiðlamaður og íþróttahetja hefði kvatt þennan heim á Taílandi í gær.

„Íslendingar eru fátækari í dag, en í gær, að gengnum Gleðigjafanum Hemma Gunn! Blessuð sé minning um góðann dreng,“ sagði Heiðar snyrtir.

„Elsku kallinn....mikið óttalega verður þetta undarleg tilvera án Hemmanns:-/ Og mikil ósköp sem hann var skemmtilegur þessi elska:-) Maður passaði sko upp á það að fá eitt gott Hemmaknús í hvert skipti sem maður hitti hann:-) Og svo ilmaði maður eins og Hemminn það sem eftir lifði dags, umvafinn einhverjum agalega fínum herrailm sem hann setti á sig eftir morgunraksturinn:-) Hann samgladdist alltaf þegar vel gekk ellegar studdi & hvatti þegar sú var þörfin - hann var algert Eðalmenni hann Hemmi ♥

Hvíl í friði elskulegur og knúsaðu nú þetta lið "a la Hemmastæl" þarna hinu megin frá okkur dúllusnúðunum hérna megin ♥ ♥ ♥ —,“ sagði söngkonan Hera Björk.

„Tileinka Hemma Gunn, góðum kunningja mínum, kvöldið og nóttina og þakka honum samfylgd. Jöfur fallinn frá. Allir mannlegir kostir og brestir rúmuðust innra með Hemma, þess vegna var hann svo stór og speglaði alltaf eitthvað í okkur sjálfum. Þá eru ótaldir ýmsir hæfileikar hans. Þakklátur fyrir síðustu samskipti okkar hér á fb, þau voru falleg eins og flest sem Hemmi kom að. Far vel, Hemmi,“ sagði Björn Þorláksson ritstjóri Akureyrarblaðs.

„Elsku Elsku Hemmi, mikið hvað ég sakna þessa merka höfðingja. Öðru eins ljúfmenni hef ég ekki kynnst. Hann var svo ástríkur og heill í gegn, svo sannarlega vinur vina sinna. Ekki grunaði mig að við værum að kveðjast í hinsta sinn í lokaþættinum á Bylgjunni. En við kvöddumst innilega og það yljar. Fyrsta útvarps viðtalið mitt var hjá Hemma í kringum 2007 og hann var duglegur að taka mig í spjall eftir það.

Síðast þegar við spjölluðum saman þá hafði ég orð á því að það væri í rauninni hægt að rekja ferilinn minn allan í gegnum Hemma þætti. Það voru forréttindi að fá að kynnast þér kæri vinur og ég seigi það sama og þú sagðir síðast, „ég er heppinn að getað talið þig til vina minna“ og einsog alltaf í lokin þá lofa ég að kveðja sem Ladda karakter. Hvíl í friði,“ sagði Eyþór Ingi

„Fallinn er frá yndislegur drengur og góður vinur. Hemmi Gunn var svo sannarlega einn almesti gullmoli sem Ísland hefur átt og verður hans sárt saknað. Fyrir mig voru það forréttindi að fá að kynnast Hemma og njóta góðra stunda með honum á ferðum okkar um landið. Ótrúlega traustur, fyndinn og fróður maður með frábæra nærveru. Ég og “litli frændi þinn” munum sakna þín sárt og vottum fjölskyldu þinni, ásamt landsmönnum öllum, samúð okkar. Guð geymi þig sér við hlið góði vinur,“ segir Ásgeir Kolbeinsson um Hemma Gunn vin sinn.

„Blessuð sé minning Hermanns Gunnarssonar,“ segir Víðir Sigurðsson.

„Sit hérna í Malmö í losti. Virkilega illt í hjartanu. Rétt eins og nákominn ættingi hafi fallið frá. Ég finn ennþá fyrir faðmlagi Hemma frá því fyrir nokkrum dögum þegar við hittumst í Efstaleitinu. Það fylgdi alltaf faðmlag. Forréttindi að hafa kynnst honum. Verið hress, ekkert stress, bless,“ segir Hans Steinar Bjarnason.

„Elsku Hemmi, sem lét manni alltaf líða eins og maður væri fyndnasti og skemmtilegasti maður í heimi. Hvíl í friði. Takk fyrir mig,“ segir Sólmundur Hólm.

HÉR er hægt að sjá viðtal Hemma Gunn við Davíð Oddsson, ritstjóra Morgunblaðsins, sem var borgarstjóri í Reykjavík árið 1990.