Dorrit slær á skilnaðarsögurnar

Forsetafrúin Dorrit Moussaieff prýðir forsíðu jólablaðs MAN sem kemur í verslanir á morgun, fimmtudag. Í opinskáu viðtali við tímaritið blæs Dorrit m.a. á sögusagnir um skilnað þeirra hjóna.

„Hvaðan koma þessar sögusagnir? Þetta er hrein vitleysa. En þessi kjaftagangur truflar mig svo sem ekki enda hef ég alltaf heyrt sögur um sjálfa mig – stundum væri gaman ef þær væru sannar... Þetta geta verið mjög spennandi sögur eins og sú sem ég heyrði nýverið um að ég eigi enskan bankamann að elskhuga, ég er bara upp með mér enda er ég orðin 64 ára gömul.“ 

Dorrit, sem er flutt til London til að sinna fjölskyldufyrirtækinu, kom til landsins fyrir viðtalið og myndatökuna auk þess sem hún sinnti opinberum erindum ásamt forsetanum á Fullveldisdaginn 1.desember. Forsíðumyndatakan fór fram á Bessastöðum og vakti m.a. athygli Eiríks Jónssonar ritstjóra Séð og Heyrt sem skrifaði um hana á vefsíðu sinni www.eirikurjonsson.is og velti fyrir sér tilstandinu: „Í fyrri viku vann harðsnúið lið við að farða forsetfrúna á forsetasetrinu fyrir myndatöku og fór dagurinn í það. Ekki er vitað fyrir hvaða fjölmiðil myndatakan var en mikið var í lagt og því má ætla að hann sé erlendur.“

• 1 blogg um fréttina

Bloggað um fréttina

• Ómar Ragnarsson: Slúðrið elskar skilnaðarsögur.