Kanye West kemur til Íslands á morgun

Rapparinn Kanye West, eiginmaður Kim Kardashian, er á leið til Íslands. Samkvæmt heimildum Smartlands Mörtu Maríu mun hann mæta til landsins á morgun en hann ætlar að taka upp myndband á Íslandi. Ekki er vitað hvort hann ætlar að taka Bieber á þetta eða hvar á landinu myndbandið verður nákvæmlega tekið upp. 

Á meðan á dvöl hans stendur mun hann gista á 101 Hóteli eins og er svo vinsælt hjá erlendum stórstjörnum. 

Annars hefur West ekki alveg átt sjö dagana sæla upp á síðkastið en fréttir herma að hann sé bæði blankur og að hjónaband hans og Kardashian hangi á bláþræði. Og ekki skánaði samband hjónanna þegar hann bað Mark Zuckerberg stofnanda Facebook um að gefa sér peninga. 

Það er kannski ekki skrýtið að West/Kardashian hjónin séu blönk því lífsstíll þeirra er afar kostnaðarsamur og þótt bæði hafi ágætar tekjur þá virðist það ekki duga til. Kardashian sést til dæmis ekki oft í sama dressinu tvisvar og hún lætur helst ekki sjá sig í öðru en merkjavöru. 

Hjónin eignuðust á dögunum barn númer tvö, soninn Saint West, en fyrir áttu þau dótturina North West. Síðan parið ruglaði saman reitum hefur samband þeirra nánast verið í beinni útsendingu á samfélagsmiðlum. Miðað við þann tíma sem þau eyða í partístand og opinberar uppákomur virðist ekki vera mikill tími aflögu fyrir þau sem hjón. Miðað við annríki þeirra er hæpið að þau nái einhvern tímann að slaka á saman og rækta nándina sem er svo mikilvæg í ástarsamböndum. 

Kim frumsýnir soninn