Aðfaranótt mánudags réðust vopnaðir, grímuklæddir menn inn á hótelherbergi raunveruleikastjörnunnar Kim Kardashian, bundu hana niður og höfðu á brott með sér skartgripi sem metnir eru á tæpan 1,3 milljarð íslenskra króna.
Ekki hefur verið greint frá því hvaða skartgripir það voru sem teknir voru í árásinni, en stjarnan hefur undanfarna daga verið stödd á tískuvikunni í París þar sem hún hefur skartað fjölmörgum ákaflega verðmætum munum.
Franska lögreglan greindi frá því að ræningjarnir hefðu haft á brott með sér skartgripaskrín hlaðið dýrgripum og þar á meðal hring sem metinn er á fjórar milljónir evra, eða rúmlega 513 milljónir íslenskra króna. Þá var tveimur farsímum í eigu stjörnunnar einnig stolið, en á þeim er að finna mikið af persónulegum upplýsingum.
Skömmu áður en ránið bar að deildi Kardashian mynd af sér á samfélagsmiðlum þar sem hún skartar stærðarinnar demantshring, ásamt gylltu, demantsskreyttu tannskrauti. Hringurinn sem um ræðir var gjöf frá eiginmanni hennar, en rapparinn hannaði hringinn sjálfur og gaf Kardashian hann í síðasta mánuði.
Hringurinn er annar trúlofunarhringur stjörnunnar, en hann er samskonar og sá sem West gaf stjörnunni þegar hann bað um hönd hennar árið 2013, fyrir utan það að demanturinn í þeim nýja er stærri. Sá fyrri skartar 14 karata demanti, en demanturinn í nýja hringnum er 20 karöt líkt og fram kemur í frétt Huffington Post.
Kardashian skartaði hringnum í París, en hún deildi einnig mynd af honum á Instagram nokkru fyrir ránið. Líklegt þykir að hringurinn sé sá sami og stolið var úr hótelherbergi stjörnunnar.