Smartland Mörtu Maríu | Frægð | mbl | 6.5.2024 | 22:00 | Uppfært 7.5.2024 12:56

Forsetaframbjóðandi á þekkta hálfsystur

Viktor Traustason og Ástrós Traustadóttir. Samsett mynd

Viktor Traustason forsetaframbjóðandi kom eins og þruma úr heiðskíru lofti inn í baráttuna um forsetaembættið.

Flestir landsmenn þekktu hvorki haus né sporð á þessum unga manni en hann varð landsþekktur á einni nóttu þegar hann skilaði inn meðmælendalista fyrir forsetaframboð sitt.

Forsetaframbjóðandinn ungi er menntaður hagfræðingur og fagnaði 35 ára afmæli sínu þann 10. apríl síðastliðinn. Samkvæmt stjórnarskrá Íslands er hver 35 ára gamall maður, sem fullnægir skilyrðum til kosningarréttar, kjörgengur til forseta.

Lítið er vitað um fylgistölur Viktors en framboð hans gerðist ekki gilt fyrr en 2. maí.

Frétt af mbl.is

Framboð Viktors metið gilt

Landsþekkt hálfsystkin

Viktor er ekki eini landsþekkti einstaklingurinn í ættinni. Hálfsystir hans er Ástrós Traustadóttir, samkvæmisdansari, raunveruleikastjarna, áhrifavaldur og meðlimur LXS-hópsins, en sá telur nokkra af þekktustu áhrifavöldum landsins sem geta án efa ýtt undir vinsældir Viktors og aðstoðað hann í framboðsbaráttunni.

Hálfsystkinin eru samfeðra. Faðir þeirra er Trausti Ívarsson fyrrverandi sölustjóri hjá sælgætisframleiðandanum Nóa Siríus. Margir landsmenn, þá sérstaklega fótboltaunnendur, kannast án efa við föður þeirra en Trausti spilaði með Víkingi á yngri árum.