Hulunni svipt af „fótósjopp“

Sú óraunverulega mynd sem dregin er upp af fyrirsætum og frægu fólki á ljósmyndum tískublaða og tímarita hefur mikið verið til umræðu á opinberum vettvangi. Heilbrigðisyfirvöld og aðilar sem láta sig málið varða hafa varað stórlega við því hvernig undratólið „fótósjopp“ er notað  til að fegra útlitið; afmá hrukkur, mjókka mitti, fjarlæga appelsínuhúð. Nú hafa bandarískir tölvunarfræðingar þróað forrit sem sviptir hulunni af „fótosjopp“ og gerir kleift að greina allar lagfæringar sem gerðar hafa verið á ljósmyndum og sýna þær fyrir og eftir.

Mikið hefur verið fjallað um óraunverulega ímynd tískufyrirsæta og þau röngu skilaboð sem tískuiðnaðurinn sendir neytendum, með hjálp „fótósjopp“. Áhrifin eru að margra áliti sögð mjög skaðleg og talin ýta undir átröskunarsjúkdóma, einkum á meðal ungra stúlkna, að því er kemur fram í The Daily Mail.

Höfundar tölvuforritsins telja að það þjóni ekki aðeins neytendum heldur einnig auglýsendum og útgefendum að birta með ljósmyndum upplýsingar um hvaða stafrænu breytingar hafa verið gerðar á þeim. Þannig sjáist svart á hvítu hve margar myndir séu fjarri raunveruleikanum.

• 1 blogg um fréttina

Bloggað um fréttina

• Ómar Ragnarsson: "Músísjopp" er líka stundað.