Lady Gaga klæddi sig eftir veðri

Söngkonan Lady Gaga klæddist glæsilegri grárri ullarslá þegar hún lenti á Reykjavíkurflugvelli í morgun. Hún var í pilsi innanundir, í svörtum hælum með hatt á höfði. Hárið á söngkonunni er óvenju venjulegt þessa dagana eða sítt og kastaníubrúnt á litinn. Hatturinn bjargaði hárgreiðslunni í morgun því það hellirigndi þegar ungfrú Gaga lenti í Reykjavík.

Einkaflugvél söngkonunnar lenti tæplega hálftíu í morgun en söngkonan sjálf kom ekki út úr vélinni fyrr en klukkutíma síðar. Ekki er vitað hvað hún var að gera um borð í vélinni í klukkutíma en miðað við klæðaburð hennar hefur hún líklega verið að punta sig.

Lady Gaga mun taka við viðurkenningu úr LennonOno-friðarsjóðnum í Hörpu í dag kl. 14.00 og er mikil öryggisgæsla í Hörpu vegna afhendingarinnar.

Meðan á dvöl söngkonunnar stendur hefur hún aðsetur á Hótel Borg.