Þessi jakki er að gera allt vitlaust

66°Norður og danska herratímaritið Euroman kynntu fyrir stuttu samstarf sitt í Danmörku. Um er að ræða nýjan jakka sem hönnunarteymi 66°Norður og tískuritstjóri Euroman, Fredrik Andersen, hönnuðu í sameiningu. Jakkinn er hannaður með það fyrir augum að hægt sé að klæðast honum t.d. undir frakka en einnig einan og sér. Jakkinn er einangraður með Primaloft Gold efninu og því tilvalinn í kaldari veðrum. 400 jakkar voru í boði til áskrifenda Euroman í Danmörku á sérstöku tilboði og voru þeir ekki lengi að seljast upp.

„Það var virkilega skemmtilegt og mikill heiður fyrir okkur að fá að vinna með 66°Norður að þessum jakka. Við vissum að viðbrögðin yrðu góð en það kom okkur á óvart að jakkinn skyldi seljast svo fljótt upp, eða nokkrum klukkustundum. Það er kannski ekkert svo skrítið því hann er mjög flottur þótt ég segi sjálfur frá," segir Frederik Andersen, tískuritstjóri Euroman og Eurowoman, og hlær. Jakkinn verður fáanlegur í takmörkuðu upplagi í völdum verslunum 66°Norður hér heima og á vefnum.