Pippa Middleton valdi breska fatahönnuðinn Giles Deacon til þess að hanna á sig fallegan og klassískan brúðarkjól fyrir brúðkaup sitt og James Matthews sem fram fór á laugardaginn síðastliðinn. 

Fallegur textíllinn naut sín í kjól Pippu en kjóllinn náði vel upp í háls og var fleginn í bakið. Það er nokkuð ljóst að Pippa hefur ekki viljað vera í eins kjól og systir hennar, Katrín hertogaynja, gifti sig í en sá kjóll var mátulega fleginn. Ermarnar á kjól Pippu voru síðan stuttar og sást vel í vöðvastælta handleggi Pippu en fjölmiðlar ytra hafa lýst þeim sem flottasta fylgihlut Pippu. 

En þegar kemur að hefðbundnari fylgihlutum vakti það athygli að Pippa skartaði sömu eyrnalokkum og þegar hún komst í heimspressuna sem brúðarmær Katrínar hertogaynju og Vilhjálms Bretaprins fyrir sex árum. Hún tók enga áhættu í skóvali sínu og valdi brúðarskó frá Malono Blahnik.