Guðjón er ekki í atvinnuleit

Gengi Skagamanna í Landsbankadeildinni hefur ekki verið upp á marga fiska og situr liðið í þriðja neðsta sæti eftir 8 leiki. Fátt virðist ganga upp í sókn og vörn hjá ÍA. Guðjón Þórðarson, þjálfari liðsins, er bjartsýnn á að gengi liðsins muni lagast á næstunni og hann er ekki að leita sér að nýrri vinnu á erlendri grund.

Skagamenn komu verulega á óvart í fyrra með því að enda í þriðja sæti deildarinnar. Væntingarnar voru meiri í ár hjá stuðningsmönnum liðsins en byrjunin hefur ekki verið sem best. Guðjón telur að það sé hugarfar leikmanna sem þurfi að lagast.

„Það sem er að gerast í kollinum á mönnum er að það eru allir að bíða eftir því að einhver annar taki af skarið,“ segir Guðjón en hann telur ekki að það vanti leiðtoga í liðið.

„Það eru tjáskiptin og samvinnan sem er hluti af vandamálinu. Það vantar meiri samfellu og ákefð í liðið.

„Við erum ekki að leita að neinum leikmönnum. Það hefur ekkert verið rætt í okkar hóp að sækja einhverja leikmenn. Við þurfum að klára þetta sjálfir.

Ósáttur við stöðuna

„Ég er mjög ósáttur við stöðu liðsins. Ef menn halda það að ég sé í fótbolta og reyni ekki að vinna þá er það mjög rangt. Við erum búnir að æfa mikið. Það hafa allir lagt mikla vinnu í þetta verkefni en hlutirnir hafa ekki gengið upp hjá okkur fram til þessa. Það eru ýmsar ástæður fyrir því og við ætlum að leysa það innan hópsins.“

Í umræðunni