Íþróttir | Íslenski fótboltinn | mbl | 30.8.2008 | 15:50 | Uppfært 16:42

Valur með meistaratitilinn í höndunum

Dóra María Lárusdóttir hefur leikið mjög vel með Val í sumar. mbl.is

Valur er með meistaratitilinn í höndunum eftir sigur á Fylki, 5:1, í næstsíðustu umferð Landsbankadeildar kvenna á Fylkisvellinum í dag. Fyrir lokaumferðina skilja þrjú stig Val og KR að en KR-konur þyrftu að sigra Aftureldingu með um eða yfir 20 marka mun og Valur að tapa fyrir Stjörnunni til að titillinn færi í Vesturbæinn.

Á 15. mínútu smeygði Margrét Lára Viðarsdóttir sér í gegnum vörn Fylkis og skoraði.

Hallbera Guðný Gísladóttir bætti við öðru marki á 37. mínútu.

Margrét Lára fékk stungusendingu upp völlinn, lék á markvörðinn og skoraði sitt annað mark og þriðja Vals.

Rakel Logadóttir tók góða sprett upp vinstri kantinn og gaf fyrir á Margréti Láru, sem lék á markvörðinn og skoraði með skoti í stöng og inn.

Margrét Lára fékk góða sendingu fyrir markið en lagði boltann fyrir Kristínu Ýr Bjarnadóttur, sem skoraði af öryggi.

Í snöggri sókn Fylkis á 87. mínútu barst boltinn til Ruth Þórðardóttur, sem skaut úr vítateig, Ása Dögg Aðalsteinsdóttir markvörður Vals varði en hélt ekki boltanum svo boltinn rann yfir marklínuna.