Höskuldur kveður FH

Höskuldur Eiríksson er hættur að spila með Íslandsmeisturum FH í knattspyrnu en hann og forráðamenn Hafnarfjarðarliðsins komust í gær að samkomulagi um riftun samnings hans við félagið. Höskuldur var samningsbundinn FH-ingum fram í nóvember á þessu ári en hann gekk í raðir liðsins frá Víkingi fyrir síðustu leiktíð eftir dvöl hjá norska liðinu Viking þar sem hann varð fyrir slæmum ökklameiðslum. Höskuldur var mikið frá á síðustu leiktíð vegna meiðsla og kom aðeins við sögu í 7 af 22 leikjum FH-inga í Landsbankadeildinni.

Varnarmaðurinn gekkst undir kviðslitsaðgerð í vikunni.

Höskuldur er 28 ára gamall og hefur leikið samtals 53 leiki í efstu deild með KR, Víkingi og FH.