Íþróttir | Íslenski fótboltinn | mbl | 14.5.2009 | 21:11 | Uppfært 15.5.2009 10:37

Stórsigur Stjörnunnar gegn Þrótti

Hörð barátta í leiknum á Valbjarnarvelli í kvöld. mbl.is/Kristinn

Stjarnan vann stórsigur á Þrótti R. í annarri umferð Pepsi-deildar karla í knattspyrnu í kvöld, 6:0, en leikið var á Valbjarnarvelli. Þróttarar eru því enn án stiga, en Stjarnan hefur unnið báða sína leiki og er efst í deildinni á markamun.

Jóhann Laxdal gerði fyrsta mark leiksins á 20. mínútu, Halldór Orri Björnsson gerði annað markið á 28. mínútu og Steinþór Þorsteinsson kom Stjörnunni í 3:0 á 45. mínútu og þannig var staðan í hálfleik.

Í seinni hálfleik skoruðu varamenn Stjörnunnar þrjú mörk, Arnar Már Björgvinsson tvö þeirra og Magnús Björgvinsson eitt.

Þróttarar áttu ekkert skilið út úr leiknum, spiluðu lengst af hörmulega, meðan Stjarnan lék á alls oddi og beitti skyndisóknum í síðari hálfleik.

Byrjunarlið Þróttar: Henryk Forsberg Boedker- Birkir Pálsson, Þórður Steinar Hreiðarsson, Dennis Danry, Kristján Ómar Björnsson-Andrés Vilhjálmsson, Rafn Andri Haraldsson, Hallur Hallsson, Skúli Jónsson-Haukur Páll Sigurðsson, Hjörtur Júlíus Hjartarson.

Byrjunarlið Stjörnunnar: Bjarni Þórður Halldórsson-Hafsteinn Rúnar Helgason, Daníel Laxdal, Guðni Rúnar Helgason, Tryggvi Sveinn Bjarnason-Jóhann Laxdal, Björn Pálsson, Birgir Hrafn Birgisson, Halldór Orri Björnsson-Steinþór Freyr Þorsteinsson, Þorvaldur Árnason.