Baldur: Skoruðum markið sem skipti máli

Baldur Sigurðsson, miðjumaður í KR var góður gegn ÍBV í bikarleik liðanna í kvöld en hann hefur til þessa spilað í miðverðinum.  Hann átti von á hörkuleik. 

„ÍBV hefur verið að spila mjög vel í deildinni og að mæta þeim á heimavelli var ekki það sem maður óskaði sér í bikarkeppninni.  Við vissum að þetta yrði hörkuleikur en bikarinn er svona, það er allt eða ekkert og mér fannst við KR-ingar spila vel í dag.  Við vorum góðir í fyrri hálfleik og óheppnir að skora ekki en svo jafnaðist þetta aðeins í seinni hálfleik.  Við náðum hins vegar að skora markið sem skipti máli í dag og við erum mjög sáttir við það,“ sagði  Baldur sem fannst gott að fá Grétar Sigfinn Sigurðarson aftur inn í liðið.

„Já það er ekki spurning.  Hann kemur með hæð inn í liðið og sjálfstraust og munaði mikið um það í dag.  Þessi sigur kemur örugglega til með að kveikja í okkur.  Ef svona sigur gerir það ekki, þá gerir það ekkert,“ sagði miðjumaðurinn sterki.

• 1 blogg um fréttina

Bloggað um fréttina

• Gísli Foster Hjartarson: Öflugt lið