Íslandsmótið hefst í Eyjum í kvöld

Arnar Sveinn Geirsson úr Val og Viktor Örn Guðmundsson úr FH mætast á Hlíðarenda í kvöld. mbl.is/Ómar

Í kvöld verður brotið blað í sögu íslenskrar knattspyrnu þegar leikið verður innanhúss í fyrsta skipti í efstu deild karla. Á föstudag var ákveðið að færa viðureign Fylkis og Grindavíkur í knattspyrnuhúsið Kórinn í Kópavogi og leikurinn hefst þar á sama tíma og áður var fyrirhugað, eða klukkan 19.15.

Tuttugu ár eru síðan leikur var síðast fluttur af grasi yfir á annað undirlag í fyrstu umferð efstu deildar karla. Það var árið 1991 þegar tveir leikir þurftu að fara fram á malarvöllum vegna slæmra vallarskilyrða, á malarvelli Stjörnunnar í Garðabæ og KA á Akureyri, en þeir eru nú báðir horfnir og vellir af annarri tegund komnir í staðinn.

Það er hins vegar vel þekkt úr 1. deildinni að spila innanhúss í byrjun Íslandsmótsins. Þar hefur verið spilað í Kórnum, Fjarðabyggðarhöllinni á Reyðarfirði og Boganum á Akureyri í fyrstu umferðunum síðustu árin, og einnig í Reykjaneshöllinni í lokaumferð deildarinnar.

Fylkir – Grindavík

Leikir Fylkis og Grindavíkur hafa verið óútreiknanlegir undanfarin ár og liðin sigrað hvort annað á útivöllum. Fylkir vann þó báða leiki liðanna í fyrra og hefur haft betur í 12 af 22 viðureignum félaganna í efstu deild.

ÍBV – Fram

Íslandsmótið hefst í Vestmannaeyjum þar sem ÍBV tekur á móti Fram klukkan 18.

Þetta er þriðja árið í röð þar sem þessi félög mætast í fyrstu umferð. Tvö síðustu ár hafa þau mæst á Laugardalsvellinum og Fram sigraði 2:0 í bæði skiptin.

Leikurinn er líka sögulegur vegna þess að Eyjamenn og Fram tóku bæði þátt í fyrsta Íslandsmótinu árið 1912.

Framarar hafa aðeins sótt tvö stig til Eyja í síðustu fimm heimsóknum sínum þangað.

Keflavík – Stjarnan

Liðin mætast á Nettóvellinum, eins og völlur Keflvíkinga heitir nú, klukkan 19.15. Stjarnan sótti síðast þrjú stig til Keflavíkur fyrir 15 árum og vann þá þar sinn eina sigur í efstu deild til þessa.

Halldór Orri Björnsson hefur reynst Keflvíkingum erfiður en hann hefur skorað fjögur mörk í fjórum viðureignum liðanna undanfarin tvö ár.

Valur – FH

Þetta eru tvö þeirra liða sem flestir spá að berjist á toppnum í ár, ásamt KR og Breiðabliki. Þau mættust líka í fyrstu umferðinni á Hlíðarenda í fyrra og þá urðu lokatölur 2:2. Viðureign þeirra hefst á Vodafonevellinum klukkan 19.15.

Valsmenn hafa aðeins fengið tvö stig úr síðustu sex viðureignum sínum við FH undanfarin ár. FH hefur unnið Val í sex af átta heimsóknum sínum á Hlíðarenda á þessari öld.